Friday, August 14, 2009

Gantimpala

Nitong nakaraang mga araw ay nabahiran ng kontrobersiya ang National Artist Award dahil sa pagtutol ng ilang mga alagad ng sining sa ilang mga napili ngayong taong ito, partikular na kay Carlo J. Caparas (Visual Arts and Film) at Cecille Guidote-Alvarez (Theater). Ayon sa mga tumututol, na kinabibilangan ng mga National Artists na sina Bienvenido Lumbera, F. Sionil Jose, Virgilio Almario at iba pa, may mga mas karapat-dapat na maging National Artists subalit nawala sa pinal na listahan. Ibinigay nilang halimbawa ang eksperto sa musika na si Dr. Ramon Santos na siyang nakakuha ng maraming boto sa “selection process” pero hindi napili.

Sa kanilang parte, iginiit nila Caparas at Alvarez na karapat-dapat sila sa karangalang iyun. Sinabi pa ni Caparas na mga “elitista” ang mga tumututol sa kanyang pagkakapili bilang National Artist at dapat siyang maging National Artist dahil sa inilapit niya ang sining sa masa sa pamamagitan ng kanyang mga komiks.

Para sa akin, ang ipinupunto naman nina G. Lumbera, et al. ay hindi ang karapatan o ang kakayanan ng mga napili, kundi ang paraan at ang “circumstances” sa likod ng pagkakapili sa kanila. Alam naman ng lahat na sina Caparas at Alvarez ay mga masugid na taga-suporta ng administrasyong Arroyo, at aminin man nila o hindi ay malaki ang papel na ginampanan ng suportang iyon sa pagkakapili sa kanila. Isa pa, bakit may naalis na kandidato para sa parangal na nakakuha naman ng maraming boto? Halatang binigyan sila ng espasyo ng pumipili ng National Artist. Sino nga ba ang namili ng mga pararangalan ngayong taong ito? Hindi ba si GMA?

Hindi ko alam kung matatawa ako o maiinis ako sa banat ni Carlo J. Caparas na elitista raw ang mga may ayaw siyang maging National Artist at karapat-dapat daw siya sa parangal dahil sa kanyang “paglalapit ng sining sa masa”. Una, kung aalamin niya ang buhay ng kanyang dalawang pinaka-mahigpit na kritiko sa usaping ito, hindi naman maituturing na mariwasa o marangya ang pinanggalingan nila. Si G. F. Sionil Jose ay nanggaling sa pamilya ng mga magsasaka sa Pangasinan samantalang si G. Bienvenido Lumbera ay naulilang lubos at inalagaan ng mga kamag-anak. Pangalawa, kung ang pagiging malapit sa masa ang magiging sukatan ng pagiging National Artist, bakit hindi pa National Artist si Dolphy? O kaya si Mars Ravelo, na mas sikat ang mga gawang komiks kaysa sa kanya? Babanat na nga lang, sablay pa. Napapatunayan lang na tama ang mga kritiko niya.

Para naman kay Gng. Alvarez, isyu ito ng delicadeza. Ikaw ang pinuno ng ahensiya ng gobyernong naatasang pag-aralan ang mga kandidato sa parangal, bakit mo ibibigay ang parangal sa sarili mo? Granted na marami po kayong naiambag para sa pagsusulong ng sining sa bansang ito, bakit hindi nyo na lang po hinintay na matapos ang termino ninyo bilang pinuno ng NCCA (National Center for Culture and the Arts) bago po kayo maghangad na maparangalan? Konting nipis lang naman po ng mukha ang hinihingi namin.

Subalit ang higit na nakalulungkot at nakakapagngitngit isipin ay ang katotohanang ang isang parangal na kasing-prestihiyoso ng National Artist Award ay para na lamang isang piraso ng karne sa ilalim ng rehimeng ito–ibinabato bilang pabuya sa mga pinakamasusugid na alagang aso. Hindi na nakuntento sa paggamit ng pera at puwesto sa gobyerno, pati mga parangal ay ginagamit na rin bilang panuhol ng administrasyon. Pero ano pa nga ba ang aasahan mo sa isang gobyernong iniluklok ng pandaraya at binubuhay ng panunuhol at panggigipit?

Kung ayaw nilang ibalik ang parangal na nakuha nila kay Gloria, ayos lang. Hayaan na lang natin silang magsaya sa nakuha nilang gantimpala sa pagpapakatuta at pagpapakaputa sa isang maruming gobyerno.

Iyun lang.

1 comment:

Unknown said...

Dear Mami_noodles,

My name is Jasmine Ferrer, a research assistant for the study, "Filipino blogging and political participation," an independent research funded by the International Development Research Centre (IDRC) Canada through its Strengthening ICT Research Capacity in Asia (SIRCA) grant program. A component of this study aims to: (1) look into the motivation of Filipinos for reading political blogs; (2) determine if and how Filipino political blog readers participate in politics, offline or online; and (3) examine whether reading political blogs have affected the nature and level of their political participation.

We'd like to request your participation as one of the survey respondents for this study. If you're interested to participate, please provide us your email address so we can send you the survey form in Word file. Feel free to send questions/clarifications to the principal researcher, Ms. Mary Grace P. Mirandilla at mg.mirandilla@gmail.com or at mpmirandilla1@up.edu.ph. To learn more about her work, visit http://www.linkedin.com/in/gracemirandilla. Info about the SIRCA grant program can be found at http://www.sirca.org.sg/.

We look forward to hearing from you soon.

Thank you very much.

Regards,

Jasmine Ferrer